ಟಾಟಾ ಟಿಯಾಗೊ ವಿಶೇಷ ಆವೃತ್ತಿ ಕಾರಿನ ಸ್ಪೈ ಚಿತ್ರಗಳು ಸೋರಿಕೆ

ನಮಗೆಲ್ಲರಿಗೂ ತಿಳಿದಿರುವಂತೆ ಟಾಟಾ ಮೋಟಾರ್ಸ್ ಸಂಸ್ಥೆಯ ಟಿಯಾಗೊ ಕಾರು ಸಾಕಷ್ಟು ಸಂಖ್ಯೆಯಲ್ಲಿ ಮಾರಾಟವಾಗಿ ಯಶಸ್ವಿ ಕಾರು ಎಂಬ ಹಣೆ ಪಟ್ಟಿಯನ್ನು ಹೊತ್ತು ತಿರುಗುತ್ತಿದೆ. ಈ ಹ್ಯಾಚ್‌ಬ್ಯಾಕ್ ಕಾರಿನಲ್ಲಿ ಬಳಸಲಾಗಿರುವ ಇಂಪ್ಯಾಕ್ಟ್ ಡಿಸೈನ್ ಟೆಕ್ನಾಲಜಿ ಭಾರತೀಯ ಖರೀದಿದಾರನ್ನು ಹೆಚ್ಚು ಸೆಳೆದಿದೆ ಎನ್ನಬಹುದು.

ಸದ್ಯ ಹೆಚ್ಚು ಸದ್ದು ಮಾಡುತ್ತಿರುವ ಟಿಯಾಗೊ ಕಾರು ಮತ್ತಷ್ಟು ವಿಶೇಷತೆಗಳನ್ನು ಪಡೆದುಕೊಂಡು ವಿಶೇಷ ಆವೃತಿಯಾಗಿ ಮತ್ತೆ ಬಿಡುಗಡೆಗೊಳ್ಳುತ್ತಿದ್ದು, ಈ ಕಾರಿನ ರಹಸ್ಯ ಚಿತ್ರಗಳು ಬಿಡುಗಡೆಗೊಂಡಿವೆ.

ಟಾಟಾ ಟಿಯಾಗೊ ವಿಶೇಷ ಆವೃತ್ತಿಯ ಕಾರು ಕೇವಲ ಎಕ್ಸ್‌ಟಿ ರೂಪಾಂತರದಲ್ಲಿ ಮಾತ್ರ ಬಿಡುಗಡೆಯಾಗಲಿದೆ ಎಂಬ ಮಾಹಿತಿ ಇದ್ದು, ಈ ಕಾರಿನ ಎಕ್ಸ್‌.ಝೆಡ್ ಆವೃತಿಯಲ್ಲಿ ಈ ಆವೃತಿ ಬಿಡುಗಡೆಗೊಳ್ಳುವುದು ಅನುಮಾನ ಎನ್ನಲಾಗಿದೆ.

ಸೋರಿಕೆಯಾಗಿರುವ ಚಿತ್ರಗಳನ್ನು ಗಮನಿಸಿದರೆ, ಸೀಮಿತ ಆವೃತ್ತಿಯ ಟಿಯಾಗೊ ಕಾರಿನ ರೂಫ್ ಕಪ್ಪು ಬಣ್ಣವನ್ನು ಪಡೆದುಕೊಂಡಿದೆ ಮತ್ತು ಕಪ್ಪು ಕವರ್ ಪಡೆದಿರುವ ಅಕ್ಕ ಪಕ್ಕದ ಕನ್ನಡಿಗಳನ್ನು ಇರಿಸಲಾಗಿದೆ. ಸ್ಟ್ಯಾಂಡರ್ಡ್ ಆವೃತ್ತಿಯಲ್ಲಿ ಇರುವಂತಹ 14 ಇಂಚಿನ ಚಕ್ರಗಳ ಬದಲಿಗೆ 13 ಇಂಚಿನ ಚಕ್ರಗಳನ್ನು ನಿಯಮಿತ ಮಾದರಿಯಲ್ಲಿ ಕಾಣಬಹುದಾಗಿದೆ.

2016ರಲ್ಲಿ ಬಿಡುಗಡೆಯಾಗಿ ಭರ್ಜರಿ ಮಾರಾಟ ಪ್ರಕ್ರಿಯೆ ಕಂಡಿರುವ ಟಾಟಾ ವಿನೂತನ ಟಿಯಾಗೊ, ಒಂದು ವರ್ಷದ ಅವಧಿಯಲ್ಲಿ 1 ಲಕ್ಷ ಬುಕ್ಕಿಂಗ್ ಪಡೆದುಕೊಳ್ಳುವ ಮೂಲಕ ಹೊಸ ಸಾಧನೆ ಮಾಡಿರುವುದನ್ನು ನಾವು ಸ್ಮರಿಸಬಹುದಾಗಿದೆ.

ಈ ನವೀನ ರೀತಿಯ ಹ್ಯಾಚ್‌ಬ್ಯಾಕ್ ಶೈಲಿಯ ಸೀಮಿತ ಆವೃತಿಯೂ 1.2-ಲೀಟರ್ ಪೆಟ್ರೋಲ್ ಎಂಜಿನ್ ಹೊಂದಿದ್ದು, 1.05-ಲೀಟರ್ ಡೀಸೆಲ್ ಎಂಜಿನ್ ವ್ಯವಸ್ಥೆಯನ್ನು ಸಹ ಪಡೆದುಕೊಂಡಿದೆ.

ಈಗಾಗಲೇ ಸಾಮಾನ್ಯ ಮಾದರಿಯ ಕಾರು ಭಾರತೀಯ ಗ್ರಾಹಕರನ್ನು ತನ್ನೆಡೆಗೆ ಸೆಳೆಯಲು ಯಶಸ್ವಿಯಾಗಿದ್ದು, ಸದ್ಯ ಅನಾವರಣಗೊಳ್ಳುವ ಹಂತದಲ್ಲಿರುವ ಈ ವಿಶೇಷ ಆವೃತಿಯ ಕಾರಿಗೆ ಜನರು ಹೇಗೆ ಪ್ರತಿಕ್ರಿಯೆ ವ್ಯಕ್ತಪಡಿಸಲಿದ್ದಾರೆ ಕಾದು ನೋಡಬೇಕಾಗಿದೆ.