ತಲಾಷ್‌ನಲ್ಲಿ ಮಿಂಚಲಿದೆಯೇ ಪ್ಲಾಪ್ ಸ್ಟಾಲಿಯೊ

ಬಹುನಿರೀಕ್ಷಿತ ತಲಾಷ್ ಚಿತ್ರದಲ್ಲಿ ಅಮೀರ್ ಖಾನ್ ಮಹೀಂದ್ರ ಆಂಡ್ ಮಹೀಂದ್ರ ಕಂಪನಿಯ ಸ್ಟಾಲಿಯೊ ಬೈಕ್ ಬಳಸಿಕೊಂಡಿದ್ದಾರೆ. ನಿಮ್ಮ ಮಾಹಿತಿಗಾಗಿ ಸ್ಟಾಲಿಯೊ ಬೈಕ್ ಮೊದಲ ಬಾರಿಗೆ 2010ರಲ್ಲಿ ಬಿಡುಗಡೆ ಮಾಡಲಾಗಿತ್ತು.

ಗೇರ್ ಬಾಕ್ಸ್ ತೊಂದರೆ ಹಾಗೂ ಗ್ರಾಹಕರಿಂದ ವ್ಯಾಪಕ ದೂರುಗಳು ಬಂದಿದ್ದರಿಂದ ಸ್ಟಾಲಿಯೊ ಬೈಕನ್ನು ಹಿಂಪಡೆಯಲಾಗಿತ್ತು. ಒಟ್ಟಿನಲ್ಲಿ ಮಹೀಂದ್ರ ನಿರೀಕ್ಷಿಸಿದಷ್ಟು ಯಶಸ್ಸು ಸ್ಟಾಲಿಯೊದಿಂದ ದೊರಕಿರಲಿಲ್ಲ.

ಸ್ಟಾಲಿಯೊ ಮೂಲಕ ದೇಶದ ಮೋಟಾರ್ ಬೈಕ್ ಜಗತ್ತಿಗೆ ಮಹೀಂದ್ರ ಮೊದಲ ಬಾರಿಗೆ ಕಾಲಿಟ್ಟಿತ್ತು. ಆದರೆ ಮೊದಲ ಪ್ರಯತ್ನದಲ್ಲೇ ವೈಫಲ್ಯವನ್ನು ಅನುಭವಿಸಿತ್ತು. ಪ್ರಸ್ತುತ ಸ್ಟಾಲಿಯೊ ಉತ್ಪಾದನೆಯನ್ನು ಸ್ಥಗಿತಗೊಳಿಸಲಾಗಿದೆ.

ಅಂದ ಹಾಗೆ ಮಹೀಂದ್ರ ಆಂಡ್ ಮಹೀಂದ್ರ ಕಂಪನಿಯು ಸ್ಟಾಲಿಯೊ ಬೈಕ್‌ನ ಪರಿಷ್ಕೃತ ಆವೃತ್ತಿಯನ್ನು ಬಿಡುಗಡೆ ಮಾಡಲು ಸನ್ನದ್ಧವಾಗುತ್ತದೆ. ಮುಂದಿನ ವರ್ಷ ಸ್ಟಾಲಿಯೊ ಮಾರುಕಟ್ಟೆ ಪ್ರವೇಶಿಸುವ ನಿರೀಕ್ಷೆಯಿದ್ದು, ತಿರುಗೇಟು ನೀಡುವ ಭರವಸೆಯಿದೆ.

ಸ್ಟಾಲಿಯೊ ಪ್ರಚಾರಾರ್ಥವಾಗಿ ಬಾಲಿವುಡ್‌ನ ಶ್ರೇಷ್ಠ ನಟ ಅಮೀರ್ ಖಾನ್ ಅವರನ್ನು ಮಹೀಂದ್ರ ಕಂಪನಿ ಬಳಸಿಕೊಂಡಿತ್ತು. ಕಂಪನಿ ಇದೀಗ ಸ್ಟಾಲಿಯೊದ ಫೇಸ್‌ಲಿಫ್ಟ್ ಮಾಡೆಲ್ ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಯೋಜನೆ ಹಾಕಿಕೊಂಡಿದೆ.

ತಲಾಷ್ ಚಿತ್ರದಲ್ಲಿ ಅಮೀರ್ ಖಾನ್ ಸ್ಟಾಲಿಯೊ ಬೈಕ್ ಬಳಕೆ ಮಾಡಿದ್ದರಿಂದ ಚಿತ್ರಕ್ಕೆ ಯಾವುದೇ ಪರಿಣಾಮ ಬೀರದೇ ಇರಬಹುದು. ಆದರೆ ಮಹೀಂದ್ರ ಕಂಪನಿಗೆ ಮಾತ್ರ ಪರಿಷ್ಕೃತ ಆವೃತಿ ಬಿಡುಗಡೆಗೆ ಉತ್ತಮ ಪ್ರಚಾರ ದೊರಕಿದಂತಾಗುತ್ತದೆ.

ಇತ್ತೀಚೆಗಷ್ಟೇ ಸ್ಟಾಲಿಯೊ ಬೈಕ್‌ನ ಸ್ಪೈ ಷಾಟ್ಸ್ ಬಿಡುಗಡೆ ಮಾಡಿದ್ದ ಮಹೀಂದ್ರ ಕಂಪನಿಯು ಮುಂದಿನ ವರ್ಷ ಪರಿಷ್ಕೃತ ಆವೃತ್ತಿ ಬಿಡುಗಡೆ ಮಾಡುವುದಾಗಿ ಘೋಷಿಸಿತ್ತು.

ಸ್ಟಾಲಿಯೊ ಅದೃಷ್ಟ ಖುಲಾಯಿಸಲಿದೆಯೇ ಎಂಬುದನ್ನು ಕಾದುನೋಡಬೇಕಾಗಿದೆ.