ಇನ್ನು ಮುಂದೆ ಕಾಂಗರೂ ನಾಡಲ್ಲಿ ಡ್ರೈವರ್ ಇಲ್ಲದೆಯೂ ಬಸ್ ಓಡುತ್ತೆ!

By Nagaraja

Published: Friday, September 2, 2016, 13:02 [IST]

ಡ್ರೈವರ್ ಲೆಸ್ ಅಥವಾ ಚಾಲಕರಹಿತ ತಂತ್ರಜ್ಞಾನದ ಕಾಲ ಹತ್ತಿರ ಬಂದಿದೆ. ಗೂಗಲ್ ನಂತಹ ದೈತ್ಯ ಸಂಸ್ಥೆಗಳು ಡ್ರೈವರ್ ಲೆಸ್ ಕಾರುಗಳ ಅಭಿವೃದ್ಧಿಯಲ್ಲಿ ತೊಡಗಿಸಿಕೊಂಡಿದೆ. ಆದರೆ ಇದು ಕಾರಿಗಷ್ಟೇ ಸೀಮಿತವಲ್ಲ. ಯಾಕೆಂದರೆ ಆಸ್ಟ್ರೇಲಿಯಾದಲ್ಲಿ ಚಾಲಕರಹಿತ ಬಸ್ ತಂತ್ರಜ್ಞಾನವು ನನಸಾಗುವ ಕಾಲ ಇನ್ನು ಬಹಳ ದೂರವಿಲ್ಲ.

ದಕ್ಷಿಣ ಪರ್ತ್ ನಲ್ಲಿ ರಾಯಲ್ ಆಟೋ ಕ್ಲಬ್ (ಆರ್ ಎಸಿ) ಇಂಟೆಲಿಬಸ್ ಆಗಲೇ ಪರೀಕ್ಷಾರ್ಥ ಚಾಲನೆ ಪ್ರಯೋಗವನ್ನು ಆರಂಭಿಸಿದೆ. ಇದು ಆಸ್ಟ್ರೇಲಿಯಾದ ಮೊತ್ತ ಮೊದಲ ಡ್ರೈವರ್ ಲೆಸ್ ಬಸ್ಸೆಂಬ ಗೌರವಕ್ಕೂ ಪಾತ್ರವಾಗಿದೆ.

ಇನ್ನು ಮುಂದೆ ಕಾಂಗರೂ ನಾಡಲ್ಲಿ ಡ್ರೈವರ್ ಇಲ್ಲದೆಯೂ ಬಸ್ ಓಡುತ್ತೆ!

ಫ್ರಾನ್ಸ್ ಮೂಲದ ನವ್ಯ ಎಸ್ ಎಎಸ್ ಸಂಸ್ಥೆಯ ಜೊತೆಗಾರಿಕೆಯಲ್ಲಿ (NAVYA SAS) ನಿರ್ಮಾಣವಾಗಿರುವ ಆಸ್ಟ್ರೇಲಿಯಾದ ಮೊತ್ತ ಮೊದಲ ಸ್ವಯಂಚಾಲಿತ ಬಸ್ ಎಲೆಕ್ಟ್ರಿಕ್ ತಂತ್ರಗಾರಿಕೆಯನ್ನು ಪಡಿದುಕೊಂಡಿದೆ. ತನ್ಮೂಲಕ ಸಂಪೂರ್ಣ ಪರಿಸರ ಸ್ನೇಹಿ ಎನಿಸಿಕೊಂಡಿದೆ.

ದಕ್ಷಿಣ ಪರ್ತ್ ನಲ್ಲಿ ಚಾಲನೆ ಪರೀಕ್ಷೆಗೆ ಒಳಪಡಲಿರುವ ಡ್ರೈವರ್ ಲೆಸ್ ಬಸ್, 2ಡಿ ಹಾಗೂ ತ್ರಿಡಿ ಲಿಡಾರ್ ಸೆನ್ಸಾರ್ ಗಳನ್ನು ಹೊಂದಿದೆ. ಇದು ಬಸ್ ಚಲಿಸುವಾಗ ಯಾವುದೇ ಅಡೆತಡೆಗಳು ಎದುರಾದ್ದಲ್ಲಿ ಪತ್ತೆ ಹಚ್ಚಲು ಹಾಗೂ ತಪ್ಪಿಸಲು ನೆರವಾಗಲಿದೆ.

ಇನ್ನು ಸ್ಟೀರಿಯೋವಿಷನ್ ಕ್ಯಾಮೆರಾಗಳು ಟ್ರಾಫಿಕ್ ಬೆಳಕು, ಇತರೆ ವಾಹನಗಳು ಹಾಗೂ ರಸ್ತೆಯಲ್ಲಿರುವ ಎಲ್ಲ ತರಹದ ಅಂಶಗಳನ್ನು ಪರೀಶೀಲಿಸಲು ಯಶಸ್ವಿಯಾಗಲಿದೆ.

ಜಿಪಿಎಸ್ ಹಾಗೂ ದೂರಮಾಪನ ವ್ಯವಸ್ಥೆಗಳಿಂದ ಬಸ್ಸಿನ ಸ್ಥಾನ ನಿಖರವಾಗಿ ಅಳೆಯಲು ಸಾಧ್ಯವಾಗಲಿದೆ. ಇನ್ನು ಅಪಘಾತವನ್ನು ತಪ್ಪಿಸಲು ಸ್ವಯಂಚಾಲಿತ ಎಮರ್ಜನ್ಸಿ ಬ್ರೇಕಿಂಗ್ (ಎಇಬಿ) ವ್ಯವಸ್ಥೆಯನ್ನು ಒದಗಿಸಲಾಗಿದೆ.