ಮಸ್ದಾರ್ ಪೇಟೆಯಲ್ಲಿ ಮೋದಿ 'ಗಿಮಿಕ್-ಚಮಕ್'

By Nagaraja

Updated: Monday, August 17, 2015, 14:20 [IST]

ಸರಿ ಸುಮಾರು ಮೂರು ದಶಕಗಳ ಬಳಿಕ ಭಾರತೀಯ ಪ್ರಧಾನಿಯೊಬ್ಬರು ಇದೇ ಮೊದಲ ಬಾರಿಗೆ ಅರಬ್ ಸಂಯುಕ್ತ ಒಕ್ಕೂಟಕ್ಕೆ (ಯುಎಇ) ಭೇಟಿ ಕೊಡುತ್ತಿರುವುದು ಸಾಮಾಜಿಕ ಜಾಲತಾಣ ಸೇರಿದಂತೆ ಮಾಧ್ಯಮಗಳಲ್ಲಿ ಭಾರಿ ಸಂಚಲನವನ್ನೇ ಮೂಡಿಸಿದೆ.

Also Read: ಮೋದಿಗೆ ಹೈ ಸೆಕ್ಯೂರಿಟಿ ವಲಯ

ಭಾರತದ ಸ್ವಾತಂತ್ರ್ಯ ದಿನಾಚರಣೆಯ ಬೆನ್ನಲ್ಲೇ ಪ್ರಧಾನಿ ನರೇಂದ್ರ ಮೋದಿ ಅವರು ಎರಡು ದಿನಗಳ ಐತಿಹಾಸಿಕ ಯುಎಇ ಪ್ರವಾಸವನ್ನು ಹಮ್ಮಿಕೊಂಡಿದ್ದಾರೆ. ಇದರಂತೆ ಎರಡನೇ ದಿನವಾದ ಸೋಮವಾರದಂದು (ಆಗಸ್ಟ್ 17, 2015) ಶೂನ್ಯ ಹೊಗೆ ಹೊರಚಿಮ್ಮುವ ಮಸ್ದಾರ್ (Masdar) ಸ್ಮಾರ್ಟ್ ಸಿಟಿಯಲ್ಲಿ ಸ್ವಯಂಚಾಲಿತ ಕಾರಿನಲ್ಲಿ ಸಂಚರಿಸುವ ಮೂಲಕ ಹೆಸರು ಮಾಡಿದ್ದಾರೆ.

ಸೆಲ್ಪ್ ಡ್ರೈವಿಂಗ್ ಅಥವಾ ಸ್ವಯಂಚಾಲಿತ ಕಾರಿನಲ್ಲಿ ಮೋದಿ ಅವರ ಪ್ರಾಯೋಗಿಕ ಸಂಚಾರವು ದಿನದ ಪ್ರಮುಖ ಹೈಲೈಟ್ ಆಗಿತ್ತು. ಪ್ರಸ್ತುತ ಕಾರು ಸಂಪೂರ್ಣವಾಗಿಯೂ ಲಿಥಿಯಂ ಇಯಾನ್ ಬ್ಯಾಟರಿಯಿಂದ ನಿಯಂತ್ರಿಸಲ್ಪಟ್ಟಿದೆ.

ಸಾಫ್ಟ್‌ವೇರ್ ಮಾರ್ಗದರ್ಶಕದಿಂದ ಚಲಿಸುವ ಸ್ವಯಂಚಾಲಿತ ಕಾರಿಗೆ ಸೌರಶಕ್ತಿಯ ಮೂಲಕ ಶಕ್ತಿಯನ್ನು ಹೀರಿ ಲಿಥಿಯಂ ಬ್ಯಾಟರಿಗೆ ಚೈತನ್ಯ ತುಂಬಲಾಗುತ್ತದೆ. ಈ ವಿಶೇಷ ಕ್ಷಣವನ್ನು ಸ್ಮರಣೀಯವಾಗಿಸಲು ನೂರಾರು ಅನಿವಾಸಿ ಭಾರತೀಯರು ನಗರದ ಹೊರಗಡೆ ಸೇರಿಕೊಂಡಿದ್ದಷ್ಟೇ ಅಲ್ಲದೆ ಮೋದಿ ಪರ ಘೋಷಣೆಗಳನ್ನು ಕೂಗಿದರು.

ಮಸ್ದಾರ್ ನಗರಾಭಿವೃದ್ಧಿ ಮತ್ತು ಮುಂದಿನ ಪೀಳಿಗೆಯ ನಗರಗಳ ಅಂತರಗಳ ಬಗ್ಗೆ ಕೂಲಂಕುಷವಾಗಿ ಪರೀಕ್ಷೆ ನಡೆಸಿದ ಮೋದಿ ನಗರದ ಪ್ರಧಾನ ವಾಸ್ತುಶಿಲ್ಪಿಯನ್ನು ಭೇಟಿಯಾಗಿ ಚರ್ಚೆ ನಡೆಸಿದರು.

ನಿಮ್ಮ ಮಾಹಿತಿಗಾಗಿ, ಮಸ್ದಾರ್ ಜಗತ್ತಿನ 'ಝೀರೋ ಕಾರ್ಬನ್ ಕಾರು ಫ್ರಿ' ನಗರವಾಗಿದ್ದು (world's first zero-carbon, car-free city), ಭವಿಷ್ಯದಲ್ಲಿ ಇದೇ ಸಿದ್ಧಾಂತವನ್ನು ಭಾರತದ ನಗರಗಳಲ್ಲೂ ಆಳವಡಿಸುವ ಯೋಜನೆಯನ್ನು ಮೋದಿ ಹೊಂದಿದ್ದಾರೆ.