ಇದಕ್ಕಿಂತ ಇನ್ನೇನು ಬೇಕು ? ಐಕಾನಿಕ್ 'ಜಾವಾ' ಬೈಕ್ ಗಳಿಗೆ ಪುನರ್ಜ್ಮನ!

ಪ್ರೀಮಿಯಂ ಹಾಗೂ ಐಕಾನಿಕ್ ಮೋಟಾರ್ ಸೈಕಲ್ ವಿಭಾಗವನ್ನು ಗುರಿ ಮಾಡಲಿರುವ ಮಹೀಂದ್ರ, ಹಳೆಯ ಜೀವನಶೈಲಿಯನ್ನು ಹೊಸ ರೀತಿಯಲ್ಲಿ ಮರು ಸೃಷ್ಟಿ ಮಾಡಲಿದೆ.

ಮಹೀಂದ್ರ ಉಪಾಂಗ ಸಂಸ್ಥೆಯಾಗಿರುವ ಕ್ಲಾಸಿಕ್ ಲೆಜೆಂಡ್ಸ್ ಭಾರತ ಮತ್ತು ಪೂರ್ವ ಏಷ್ಯಾದಲ್ಲಿ ಜಾವಾ ಬ್ರಾಂಡ್ ನಲ್ಲಿ ಹೊಸ ಉತ್ಪನ್ನಗಳನ್ನು ಮಾರಾಟ ಮಾಡಲು ಪರವಾನಗಿ ಗಿಟ್ಟಿಸಿಕೊಂಡಿದೆ.

ಜಗತ್ತಿನ ಬಹುತೇಕ ಕಡೆಗಳಲ್ಲಿ ಬಿಎಸ್ ಎ ಮತ್ತು ಜಾವಾ ತನ್ನದೇ ಆದ ವಿಶಿಷ್ಟ ಸ್ಥಾನಮಾನವನ್ನು ಕಾಪಾಡಿಕೊಂಡಿದೆ. ಈ ಪೈಕಿ ಬಿಎಸ್ ಎ ಜಾಗತಿಕ ಮಾರುಕಟ್ಟೆಯನ್ನು ಗುರಿಯಾಗಿರಿಸಿದರೆ ಜಾವಾ ಭಾರತದಲ್ಲಿ ಹೆಚ್ಚಿನ ಗಮನ ಕೇಂದ್ರಿಕರಿಸಲಿದೆ.

ವಿಶ್ವ ದರ್ಜೆಯ ಮೋಟಾರ್ ಸೈಕಲ್ ಗಳನ್ನು ನಿರ್ಮಿಸಲು ಇಟಲಿಯಲ್ಲಿರುವ ಮಹೀಂದ್ರ ರೇಸಿಂಗ್ ತಾಂತ್ರಿಕ ವಿಭಾಗ ಕೇಂದ್ರವು ನೆರವಾಗಲಿದೆ. ಇಲ್ಲಿ ನೂತನ ಬೈಕ್ ಗಳ ಅಭಿವೃದ್ಧಿಯು ಜರುಗಲಿದೆ.

ಕ್ಲಾಸಿಕ್ ಲೆಜೆಂಡ್ಸ್ ಬಿಎಸ್ ಎ ಮತ್ತು ಜಾವಾ ಮರು ಆಗಮನದೊಂದಿಗೆ ದಿಚಕ್ರ ವಾಹನ ವಿಭಾಗದಲ್ಲಿ ಮಹೀಂದ್ರ ಮತ್ತಷ್ಟು ಎತ್ತರಕ್ಕೆ ಬೆಳೆಯಲಿದೆ.

ಮಹೀಂದ್ರ ಜನಪ್ರಿಯ ಮಾದರಿಗಳಾದ ಸೆಂಚುರೊ, ಗಸ್ಟೊ ಹಾಗೂ ಮೊಜೊ ನಿರ್ಮಾಣವಾಗುವ ಮಧ್ಯ ಪ್ರದೇಶದ ಘಟಕದಲ್ಲೇ ಜಾವಾ ಬೈಕ್ ಗಳ ನಿರ್ಮಾಣವಾಗಲಿದೆ.

1950ರ ದಶಕದಲ್ಲಿ ಜಾವಾ ಮೋಟಾರ್ ಸೈಕಲ್ ಗಳನ್ನು ಭಾರತದಲ್ಲಿ ಮೊದಲ ಬಾರಿಗೆ ಪರಿಚಯಿಸಲಾಗಿತ್ತು. ಬಳಿಕ 1960ರ ದಶಕದಲ್ಲಿ ಮೈಸೂರು ತಳಹದಿಯ ಐಡಿಯಲ್ ಜಾವಾ ಇಂಡಿಯಾ ಲಿಮಿಟೆಡ್ ನಿರ್ಮಾಣವನ್ನು ಸ್ಥಳೀವವಾಗಿ ಆರಂಭಿಸಿತ್ತು.

ಬೈಕ್ ಪ್ರೇಮಿಗಳು ಇಂದಿಗೂ ಜಾವಾ ಹಾಗೂ ಯೆಜ್ಡಿ ಬೈಕ್ ಗಳನ್ನು ಓಡಿಸುತ್ತಿದ್ದಾರೆ. ಇದು ಈ ಐಕಾನಿಕ್ ಬೈಕ್ ನ ಯಶಸ್ಸಿಗೆ ಕೈಗನ್ನಡಿಯಾಗಿದೆ.

ಜಾವಾ ಆರಂಭಿಕ ಮಾದರಿಗಳು ಚೆಕೊಸ್ಲೊವೇಕಿಯಾದಲ್ಲಿ ಉತ್ಪಾದನೆಯಾಗಿದ್ದು, ಇಂಧನ ಟ್ಯಾಂಕ್ ಬದಿಯಲ್ಲಿ ಸಿಝಡ್ ಜಾವಾ ಲಾಂಛನವನ್ನು ಗಿಟ್ಟಿಸಿಕೊಂಡಿತ್ತು. ಭಾರತದಲ್ಲಿ ನಿರ್ಮಾಣವಾದ ಮಾಡೆಲ್ ಗಳು ಜಾವಾ ಲಾಂಛನದ ನಡುವೆ ಒ ಸಂಕೇತವನ್ನು ಪಡೆದಿತ್ತು.

ಅಂತಿಮವಾಗಿ 1996ರಲ್ಲಿ ಸಂಸ್ಥೆಯು ನಿರ್ಮಾಣವನ್ನು ಕೊನೆಗೊಳಿಸಿತ್ತು. ಇದೀಗ ಮಹೀಂದ್ರ ಜಾವಾ ಬ್ರಾಂಡ್ ಹೆಸರಲ್ಲಿ ಮಾರಾಟ ಹಕ್ಕು ಗಿಟ್ಟಿಸಿಕೊಳ್ಳುವ ಮೂಲಕ ಮರು ಜೀವ ಪಡೆದಿದೆ.