ಆಡಿ ಅಕ್ಟೋಬರ್ ಮಾರಾಟ ಶೇ. 35ರಷ್ಟು ಹೆಚ್ಚಳ

ಅಕ್ಟೋಬರ್ ನಲ್ಲೂ ಕೂಡ ಮಾರಾಟದಲ್ಲಿ ಆಡಿ ಮೇಲುಗೈ ಸಾಧಿಸಿದೆ. ಜರ್ಮನಿಯ ದುಬಾರಿ ಕಾರು ತಯಾರಿಕಾ ಕಂಪನಿ ಅಕ್ಟೋಬರ್ 2011ರಲ್ಲಿ 482 ಐಷಾರಾಮಿ ಕಾರುಗಳನ್ನು ಭಾರತದಲ್ಲಿ ಮಾರಾಟ ಮಾಡಿದ್ದು, ಕಳೆದ ವರ್ಷದ ಇದೇ ತಿಂಗಳ 357 ಕಾರು ಮಾರಾಟಕ್ಕೆ ಹೋಲಿಸಿದರೆ ಶೇಕಡ 35ರಷ್ಟು ಏರಿಕೆ ಕಂಡಿದೆ.

ಈ ವರ್ಷದ ಜನವರಿ ತಿಂಗಳಿನಿಂದ ಅಕ್ಟೋಬರ್ ವರೆಗೆ ಕಂಪನಿಯು ಒಟ್ಟಾರೆ 4,692 ಕಾರು ಮಾರಾಟ ಮಾಡಿದೆ. ಕಳೆದ ವರ್ಷದ ಇದೇ ಅವಧಿಯ 2,535 ಕಾರು ಮಾರಾಟಕ್ಕೆ ಹೋಲಿಸಿದರೆ ಶೇಕಡ 85.09ರಷ್ಟು ಏರಿಕೆ ದಾಖಲಿಸಿದೆ.

"ಕಂಪನಿಯು ಹೊರತಂದ ಹೊಸ ಮಾಡೆಲ್ ಕಾರುಗಳು ಮಾರಾಟ ಹೆಚ್ಚಿಸಲು ನೆರವಾಗಿದೆ" ಎಂದು ಆಡಿ ಇಂಡಿಯಾ ಪ್ರಕಟಣೆಯಲ್ಲಿ ತಿಳಿಸಿದೆ. ದೇಶದ ಮಾರುಕಟ್ಟೆಯಲ್ಲಿ ಸದ್ಯ ಆಡಿ ಮೂರನೇ ಸ್ಥಾನದಲ್ಲಿದೆ. ಕಂಪನಿಯು ತನ್ನ ಪ್ರತಿಸ್ಪರ್ಧಿಗಳಾದ ಬಿಎಂಡಬ್ಲ್ಯು ಮತ್ತು ಮರ್ಸಿಡಿಸ್ ಬೆಂಝ್ ಕಂಪನಿಗಳಿಗೆ ಪೈಪೋಟಿ ನೀಡಲು ಯತ್ನಿಸುತ್ತಿದೆ.

"ಈ ವರ್ಷ ಕೂಡ ಕಂಪನಿಗೆ ಹೆಚ್ಚು ಯಶಸ್ವಿ ವರ್ಷ. ಕಂಪನಿಯು ಇನ್ನು ಮುಂದೆಯೂ ಇಲ್ಲಿ ಆಕರ್ಷಕ ಉತ್ಪನ್ನಗಳನ್ನು ಹೊರತರುವುದನ್ನು ಮುಂದುವರೆಸಲಿದ್ದೇವೆ. ಜೊತೆಗೆ ಮಾರಾಟ ಜಾಲವನ್ನೂ ಹೆಚ್ಚಿಸಲಿದ್ದೇವೆ" ಎಂದು ಆಡಿ ಇಂಡಿಯಾ ಮುಖ್ಯಸ್ಥ ಮೈಕಲ್ ಪಾರ್ಷ್ಕೆ ಹೇಳಿದ್ದಾರೆ.