ಫಿಯೆಟ್ ಪುಂಟೊ ಸ್ಪೋರ್ಟ್ ಆವೃತ್ತಿಗೆ ಕ್ಷಣಗಣನೆ

ಆಕರ್ಷಕ ವಿನ್ಯಾಸ, ಕಾರ್ಯಕ್ಷಮತೆ ಮತ್ತು ಡೈನಾಮಿಕ್ ಡ್ರೈವಿಂಗ್ ಅನುಭವದಲ್ಲಿ ಫಿಯೆಟ್ ಪುಂಟೊ ಜನಪ್ರಿಯವಾಗಿದೆ. ಇದೀಗ ಫಿಯೆಟ್ ಕಂಪನಿಯು ಪುಂಟೊ ಸ್ಪೋರ್ಟ್ಸ್ ಆವೃತ್ತಿಯನ್ನು ಇಂದು(ಮೇ 18) ಪರಿಚಯಿಸಲು ಯೋಜಿಸಿದೆ.

ಚಿತ್ರಲೋಕ

ಫಿಯೆಟ್ ಪುಂಟೊ ಸ್ಪೋರ್ಟ್ಸ್ ಲಿಮಿಟೆಡ್ ಆವೃತ್ತಿಯನ್ನು ಮೇ 18ರಂದು ಪರಿಚಯಿಸುವುದಾಗಿ ಫಿಯೆಟ್ ಇಂಡಿಯಾ ಪ್ರಕಟಣೆಯಲ್ಲಿ ತಿಳಿಸಿದೆ. ಈ ಕಾರು 90 ಅಶ್ವಶಕ್ತಿ ಹೊಂದಿರಲಿದೆ. ನೂತನ ಪುಂಟೊ ಕಾರು ಬಾಡಿ ಡಿಕಾಲ್ಸ್, ಕ್ರೊಮ್ ಎಗ್ಸಾಟ್ ಮತ್ತು ಡ್ಯಾಷ್‌ಬೋರ್ಡ್‌ನಲ್ಲಿ ಕ್ರೋಮ್ ಲೈನಿಂಗ್ ಇತ್ಯಾದಿ ನೂತನ ಹೆಚ್ಚುವರಿ ಫೀಚರುಗಳಿರಲಿವೆ.

ನೂತನ ಫಿಯೆಟ್ ಪುಂಟೊ ಸ್ಪೋರ್ಟ್ಸ್ ಕಾರು ಕಪ್ಪು, ಬಿಳಿ ಮತ್ತು ಕೆಂಪು ಬಣ್ಣದ ಬಾಡಿ ಆಯ್ಕೆಯಲ್ಲಿ ದೊರಕಲಿದೆ. ಈ ಕಾರಿನ ದರದ ಕುರಿತು ಮಾಹಿತಿ ಸದ್ಯಕ್ಕೆ ಲಭ್ಯವಿಲ್ಲ. ಹಳೆಯ ಪುಂಟೊ ಆವೃತ್ತಿಗಿಂತ ಸುಮಾರು 30-60 ಸಾವಿರ ರು. ದುಬಾರಿಯಿರುವ ನಿರೀಕ್ಷೆಯಿದೆ.

ಇತ್ತೀಚೆಗೆ ಫಿಯೆಟ್ ಇಂಡಿಯಾ ಕಂಪನಿಯು ಟಾಟಾ ಮೋಟರ್ಸ್ ಜೊತೆಗಿದ್ದ ವಿತರಣೆ ಒಪ್ಪಂದವನ್ನು ಕೊನೆಗೊಳಿಸಿದೆ. ಇಲ್ಲಿವರೆಗೆ ಟಾಟಾ ಶೋರೂಂಗಳಲ್ಲಿ ಫಿಯೆಟ್ ಕಾರುಗಳನ್ನು ಮಾರಾಟ ಮಾಡಲಾಗುತ್ತಿತ್ತು. ಇನ್ಮುಂದೆ ಫಿಯೆಟ್ ಸ್ವಂತ ಡೀಲರ್ಷಿಪ್ ನೆಟ್ವರ್ಕ್‌ಗಳಲ್ಲಿ ಕಾರುಗಳನ್ನು ಮಾರಾಟ ಮಾಡಲಿದೆ.