ಹೊಸ ವರ್ಷದಿಂದ ಟಾಟಾ ಕಾರುಗಳು ದುಬಾರಿ

ಭಾರತದಲ್ಲಿ ಟಾಟಾ ಶ್ರೇಣಿಯ ಕಾರುಗಳಿಗೆ 5,000 ರು.ಗಳಿಂದ ಆರಂಭವಾಗಿ ಗರಿಷ್ಠ 25,000 ರು.ಗಳ ವರೆಗೆ ಬೆಲೆ ಏರಿಕೆಗೊಳಿಸಲು ನಿರ್ಧರಿಸಲಾಗಿದೆ.

2017 ಜನವರಿ 01ರಂದು ಜಾರಿಗೆ ಬರುವಂತೆಯೇ ಟಾಟಾ ಕಾರುಗಳಿಗೆ ಬೆಲೆ ಏರಿಕೆ ನೀತಿ ಅನ್ವಯವಾಗಲಿದೆ.

ಸ್ಟೀಲ್, ಅಲ್ಯೂಮಿನಿಯಂ, ತಾಮ್ರ ಹಾಗೂ ರಬ್ಬರ್ ಗಳಂತಹ ಕಚ್ಚಾ ಸರಕು ವಸ್ತುಗಳ ದರ ಏರಿಕೆಗೊಂಡಿರುವುದರಿಂದ ಬೆಲೆ ಏರಿಕೆಯು ಅನಿವಾರ್ಯವಾಗಿದೆ ಎಂದು ಟಾಟಾ ಸಂಸ್ಥೆಯು ತಿಳಿಸಿದೆ.

ಟಾಟಾ ಬೆಲೆ ಏರಿಕೆ ನೀತಿಯಿಂದಾಗಿ ಮಾರಾಟದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ಯಾಕೆಂದರೆ ನೂತನವಾಗಿ ಬಿಡುಗಡೆಯಾಗಿರುವ ಟಿಯಾಗೊ ಹ್ಯಾಚ್ ಬ್ಯಾಕ್ ಕಾರಿನ ನೆರವಿನಿಂದ ಟಾಟಾ ಸಂಸ್ಥೆಯು ತಿಂಗಳಿಂದ ತಿಂಗಳಿಗೆ ಮಾರಾಟ ಏರುಗತಿಯನ್ನು ದಾಖಲಿಸಿತ್ತು.

ಎಂಟ್ರಿ ಲೆವೆಲ್ ನ್ಯಾನೋ ಕಾರಿನಿಂದ ಆರಂಭವಾಗಿ ಆರಿಯಾ ಕ್ರಾಸೋವರ್ ಶ್ರೇಣಿಯ ವರೆಗಿನ ಕಾರುಗಳನ್ನು ಮಾರಾಟ ಮಾಡುತ್ತಿರುವ ಟಾಟಾ ಕಾರುಗಳು ದೇಶದಲ್ಲಿ ದೆಹಲಿ ಎಕ್ಸ್ ಶೋ ರೂಂ ಪ್ರಕಾರ 2.18 ಲಕ್ಷ ರು.ಗಳಿಂದ 17.29 ಲಕ್ಷ ರು.ಗಳಷ್ಟು ದುಬಾರಿಯೆನಿಸುತ್ತದೆ.

ಅಂದ ಹಾಗೆ ಟಾಟಾ ಸಂಸ್ಥೆಯು ಮೂರು ಆಕರ್ಷಕ ಕಾರುಗಳನ್ನು ಬಿಡುಗಡೆ ಮಾಡಲು ಸಜ್ಜಾಗುತ್ತಿದೆ. ಇವುಗಳಲ್ಲಿ ಟಾಟಾ ಕೈಟ್ 5, ಟಾಟಾ ನೆಕ್ಸನ್ ಮತ್ತು ಹೆಕ್ಸಾ ಪ್ರೀಮಿಯಂ ಕ್ರಾಸೋವರ್ ಕಾರುಗಳು ಸೇರಿವೆ.

ಇದರೊಂದಿಗೆ ಟಾಟಾ ಸಂಸ್ಥೆಯು ಟೊಯೊಟಾ ಹಾಗೂ ರೆನೊ ಸಂಸ್ಥೆಯ ಬೆಲೆ ಏರಿಕೆ ನೀತಿಯನ್ನು ಹಿಂಬಾಲಿಸಿದೆ. ಸದ್ಯದಲ್ಲೇ ಮತ್ತಷ್ಟು ವಾಹನ ಸಂಸ್ಥೆಗಳಿಂದ ಬೆಲೆ ಏರಿಕೆ ನೀತಿ ಪ್ರಕಟಗೊಳ್ಳುವ ಸಾಧ್ಯತೆಯಿದೆ.