2020ರೊಳಗೆ ಅಗ್ರ ಮೂರು ಸ್ಥಾನಕ್ಕೇರುವುದು ಟಾಟಾ ಗುರಿ

ಟಾಟಾ ಬಿಡುಗಡೆ ಮಾಡಲಿರುವ ಮೂರು ಕಾರುಗಳು ಇಂತಿದೆ

ಕಾಂಪಾಕ್ಟ್ ಸೆಡಾನ್ - ಟಾಟಾ ಕೈಟ್ 5

ಕಾಂಪಾಕ್ಟ್ ಎಸ್ ಯುವಿ - ಟಾಟಾ ನೆಕ್ಸನ್

ಕ್ರಾಸೋವರ್ ಎಸ್ ಯುವಿ - ಟಾಟಾ ಹೆಕ್ಸಾ

ಸದ್ಯ ಪ್ರಯಾಣಿಕ ಮಾರುಕಟ್ಟೆಯಲ್ಲಿ ಐದನೇ ಸ್ಥಾನದಲ್ಲಿರುವ ಟಾಟಾ, ದೇಶದ ಅಗ್ರ ವಾಹನ ಸಂಸ್ಥೆಗಳಾದ ಮಾರುತಿ ಸುಜುಕಿ ಮತ್ತು ಹ್ಯುಂಡೈ ಸಂಸ್ಥೆಯನ್ನು ಟಾರ್ಗೆಟ್ ಮಾಡುತ್ತಿದೆ.

ಎಲ್ಲ ವಿಭಾಗದಲ್ಲೂ ತನ್ನ ಸಾನಿಧ್ಯವನ್ನು ವ್ಯಕ್ತಪಡಿಸುವ ಮೂಲಕ ಪ್ರಯಾಣಿಕ ವಾಹನ ವಿಭಾಗದಲ್ಲಿರುವ ಅಂತರವನ್ನು ತುಂಬಿಕೊಳ್ಳುವುದು ಟಾಟಾ ಇರಾದೆಯಾಗಿದೆ. ಸದ್ಯಕ್ಕೆ ಪ್ರಯಾಣಿಕ ವಿಭಾಗದಲ್ಲಿ ಶೇಕಡಾ 60ರಷ್ಟು ಮಾತ್ರ ಸಾನಿಧ್ಯವನ್ನು ಹೊಂದಿದೆ.

ಅಂತೆಯೇ ಭವಿಷ್ಯದಲ್ಲಿ ವಾಹನ ನಿರ್ಮಿಸುವ ತಳಹದಿಯನ್ನು ಕಡಿಮೆ ಮಾಡಿ ವೆಚ್ಚ ಕಡಿತ ಮಾಡುವ ಹಾಗೂ ಆಕರ್ಷಕ ಉತ್ಪನ್ನಗಳನ್ನು ನೀಡುವ ಇರಾದೆಯನ್ನು ಟಾಟಾ ಹೊಂದಿದೆ.

ಟಾಟಾ ಈಗಾಗಲೇ ವಿವಿಧ ಉತ್ಪನ್ನಗಳ ಅಭಿವೃದ್ಧಿಯಲ್ಲಿ ತೊಡಗಿಸಿಕೊಂಡಿದೆ. ಇದನ್ನು ಹಂತ ಹಂತವಾಗಿ ಮಾರುಕಟ್ಟೆಗೆ ತರುವ ಯೋಜನೆಯನ್ನು ಸಂಸ್ಥೆಯು ಹೊಂದಿದೆ.

ವಿನ್ಯಾಸ ನೀತಿಗೆ ಹೊಸ ಆಯಾಮವನ್ನು ತುಂಬಿಕೊಂಡಿರುವ ಟಾಟಾ, ಪುಣೆ, ಬ್ರಿಟನ್ ಹಾಗೂ ಇಟಲಿಯಲ್ಲಿ ಸ್ಥಿತಗೊಂಡಿರುವ ಡಿಸೈನ್ ಸ್ಟುಡಿಯೋದಲ್ಲಿ ನಾವೀನ್ಯ ತಂತ್ರಗಾರಿಕೆಯನ್ನು ಅಭಿವೃದ್ಧಿಪಡಿಸುತ್ತಿದೆ.

ಸಮಯೋಚಿತವಾಗಿ ಕಾರುಗಳನ್ನು ಬಿಡುಗಡೆ ಮಾಡುವುದು ಟಾಟಾ ಗುರಿಯಾಗಿದೆ. ಟಾಟ ಟಿಯಾಗೊದಲ್ಲಿ ದಾಖಲಾಗಿರುವ ಅದೇ ಯಶಸ್ಸನ್ನು ಮುಂದುವರಿಸುವ ಯೋಜನೆಯನ್ನು ಹೊಂದಿದೆ.

ಈ ಬಗ್ಗೆ ಹೇಳಿಕೆ ಕೊಟ್ಟಿರುವ ಟಾಟಾ ಮೋಟಾರ್ಸ್ ಪ್ರಯಾಣಿಕ ವಾಹನ ವಿಭಾಗದ ಅಧ್ಯಕ್ಷರಾಗಿರುವ ಮಯಾಂಕ್ ಪರೀಕರ್, ಮುಂದಿನ ಐದು ವರ್ಷಗಳಿಗಿರುವ ಯೋಜನೆಗಳನ್ನು ಅಂತಿಮಗೊಳಿಸಲಾಗಿದೆ ಎಂಬ ಆತ್ಮವಿಶ್ವಾಸದ ಮಾತುಗಳನ್ನಾಡಿದ್ದಾರೆ.

ಪ್ರೀಮಿಯಂ ಹ್ಯಾಚ್ ಬ್ಯಾಕ್, ಕಾಂಪಾಕ್ಟ್ ಎಸ್ ಯುವಿ ಜೊತೆಗೆ ಕಾರ್ಯನಿರ್ವಾಹಕ ಸೆಡಾನ್ ಕಾರುಗಳತ್ತ ಟಾಟಾ ಕಣ್ಣಾಯಿಸಿದೆ. ಜನವರಿಯಲ್ಲಿ ಬಿಡುಗಡೆಯಾಗಲಿರುವ ಟಾಟಾ ಹೆಕ್ಸಾ ಇದಕ್ಕೆ ಮುನ್ನುಡಿ ಬರೆಯಲಿದೆ.

ನೂತನ ಕಾರುಗಳ ಉತ್ಪನ್ನಕ್ಕೆ ಟಾಟಾ ಮೋಟಾರ್ಸ್ ಬರೋಬ್ಬರಿ 3,500 ಕೋಟಿ ರುಪಾಯಿಗಳಿಂದ 4,000 ಕೋಟಿ ರುಪಾಯಿಗಳ ವರೆಗೆ ಹೂಡಿಕೆ ಮಾಡುತ್ತಿದೆ.

ಹಾಗೆಯೇ ಕಳೆಗುಂದಿರುವ ಹಳೆಯ ಮಾದರಿಗಳನ್ನು ವಿಸ್ಟಾ ಹಾಗೂ ಮಾಂಝಾ ರೀತಿಯಲ್ಲಿಯೇ ಮಾರುಕಟ್ಟೆಯಿಂದ ಗೇಟ್ ಪಾಸ್ ನೀಡಲಾಗುವುದು.