ಭಾರತದಲ್ಲಿ ವೆಸ್ಪಾ ರೆಡ್ ದ್ವಿಚಕ್ರ ವಾಹನ ಬಿಡುಗಡೆ ; ಬೆಲೆ ರೂ. 87,009

ಇಟಲಿಯ ಐಕಾನಿಕ್ ವಾಹನ ತಯಾರಿಕ ಸಂಸ್ಥೆಯಾಗಿರುವ ಪಿಯಾಜಿಯೊ ಕಂಪನಿ ಭಾರತದಲ್ಲಿ ತನ್ನ ಪ್ರಖ್ಯಾತ ವೆಸ್ಪಾ ರೆಡ್ 125 ಸ್ಕೂಟರನ್ನು ಭಾರತದಲ್ಲಿ ಆರಂಭಿಸಿದ್ದು, ವಿಶೇಷ ಆವೃತ್ತಿಯ ಈ ಸ್ಕೂಟರ್ ರೂ. 87,009 ಎಕ್ಸ್ ಶೋರೂಂ(ಮುಂಬೈ) ಬೆಲೆಯಲ್ಲಿ ಬಿಡುಗಡೆಯಾಗಿದೆ.

ಹೊಚ್ಚ ಹೊಸ ವೆಸ್ಪಾ ರೆಡ್ ದ್ವಿಚಕ್ರ ವಾಹನವು ಸ್ಟ್ಯಾಂಡರ್ಡ್ ಆವೃತಿಯಾದ ವೆಸ್ಪಾ 125 ಸ್ಕೂಟರನ್ನು ಆಧರಿಸಿದ್ದು, ಪ್ರಖ್ಯಾತ ರೆಡ್ ಸಂಸ್ಥೆಯ ಸಹಯೋಗದೊಂದಿಗೆ ಈ ಸ್ಕೂಟರ್ ಪ್ರಾರಂಭಿಸಲಾಗಿದೆ ಎಂದು ಕಂಪನಿ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ಜಗತ್ತಿನ ಮಾರಣಾತಿಕ ಕಾಯಿಲೆಗಳಲ್ಲಿ ಒಂದಾದ ಏಡ್ಸ್ ವಿರುದ್ಧ ಹೋರಾಟವನ್ನು ಬೆಂಬಲಿಸಿ ಜಾಗತಿಕ ಬ್ರಾಂಡ್‌ಗಳ ಸಹಯೋಗದೊಂದಿಗೆ ಈ ಜಾಗೃತಿ ಮೂಡಿಸುವ ಕಾರ್ಯಕ್ಕೆ ಪಿಯಾಜಿಯೊ ಕಂಪನಿ ಮುಂದಾಗಿದ್ದು, ಮೊದಲ ಆವೃತಿಯಾಗಿ ವೆಸ್ಪಾ ರೆಡ್ ಬಿಡುಗಡೆಯಾಗಿದೆ.

ಪ್ರತ್ಯೇಕವಾಗಿ ಭಾರತಕ್ಕೆಂದೇ ಈ ವಿಶೇಷ ಆವೃತಿಯನ್ನು ಬಿಡುಗಡೆ ಮಾಡಲಾಗಿದ್ದು, ಮಾರಾಟಗೊಳ್ಳುವ ಪ್ರತಿ ವಾಹನದ ಲಾಭದಲ್ಲಿ $ 50(ಸುಮಾರು Rs.3,277)ರಷ್ಟು ಹಣವನ್ನು ಏಡ್ಸ್ ವಿರುದ್ಧ ಹೋರಾಡಲು ಗ್ಲೋಬಲ್ ಫಂಡ್‌ಗೆ ಕೊಡುಗೆಯಾಗಿ ಕಂಪನಿ ನೀಡಲಿದೆ.

ಹೆಸರೇ ಸೂಚಿಸುವಂತೆ, ವೆಸ್ಪಾ ರೆಡ್ ವಾಹನದ ಪ್ರತಿಯೊಂದು ಅಂಶವು ಸಹ ಕೆಂಪು ಬಣ್ಣದಿಂದ ಕೂಡಿರಲಿದ್ದು, ಈ ದ್ವಿಚಕ್ರ ವಾಹನದ ಆಸನ, ಪ್ಲಾಸ್ಟಿಕ್ ಪ್ಯಾನೆಲ್‌ಗಳು ಮತ್ತು ಮಿಶ್ರಲೋಹದ ಚಕ್ರಗಳು ಕೆಂಪು ಬಣ್ಣ ಹೊಂದಿರಲಿವೆ.

ಸ್ಕೂಟರಿನ ಒಟ್ಟಾರೆ ವಿನ್ಯಾಸವು ಹಿಂದಿನ ಮಾದರಿಯಂತೆ ಇದೆ ಹಾಗು ಈ ಬಲಿಷ್ಠ ಸ್ಕೂಟರ್ 10.6 ಎನ್ಎಂ ತಿರುಗುಬಲದಲ್ಲಿ 10 ಬಿಎಚ್‌ಪಿ ಅಶ್ವಶಕ್ತಿ ಉತ್ಪಾದನೆ ಮಾಡಲಿದೆ. ಇನ್ನು ಈ ಸ್ಕೂಟರ್ ಸಿಂಗಲ್ ಸೈಡ್ ಫ್ರಂಟ್ ಸೂಸ್ಪೆನ್‌ಷನ್ ಹೊಂದಿದ್ದು, ಮುಂಭಾಗದಲ್ಲಿ 220 ಎಂಎಂ ಡಿಸ್ಕ್ ಬ್ರೇಕ್ ಮತ್ತು 12 ಇಂಚಿನ ಮಿಶ್ರಲೋಹದ ಚಕ್ರಗಳನ್ನು ಈ ಸ್ಕೂಟರ್ ಪಡೆದುಕೊಂಡಿದೆ.

"ದೇಶದಲ್ಲಿ ವೆಸ್ಪಾ ರೆಡ್ ಸ್ಕೂಟರ್ ಪರಿಚಯಿಸಲು ನಮಗೆ ಬಹಳ ಹೆಮ್ಮೆಯಿದೆ. ಸಾಂಪ್ರದಾಯಿಕ ವೆಸ್ಪಾ ದ್ವಿಚಕ್ರ ವಾಹನವು ಸಾಮಾಜಿಕವಾಗಿ ಜವಾಬ್ದಾರಿಯುತ ಬ್ರ್ಯಾಂಡ್ ಆಗಿದ್ದು, ಜಾಗೃತಿ ಮೂಡಿಸುವ ಕಾರ್ಯಕ್ಕೆ ಬೆಂಬಲಿಸುವ ಮೂಲಕ ಸಮಾಜಕ್ಕೆ ಮರಳಿ ತನ್ನ ಕೊಡುಗೆಯನ್ನು ಈ ವೆಸ್ಪಾ ನೀಡಲಿದೆ" ಎಂದು ಪಿಯಾಜಿಯೊ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಓ ಆದಂತಹ ಡಿಯಾಗೋ ಗ್ರಾಫಿ ಹೇಳಿದರು.