ಆತ್ಮವಿಮರ್ಶೆಗಿದು ಸಕಾಲವೆಂದ ರತನ್ ಟಾಟಾ

ಚಿತ್ರಲೋಕ

"ಮಹೀಂದ್ರ ಆಂಡ್ ಮಹೀಂದ್ರ ಕಂಪನಿಗೆ ಇಷ್ಟೊಂದು ಸಾಧಿಸಲು ಸಾಧ್ಯವಾಗಿರುವುದಕ್ಕೆ ನಾನು ಹೆಚ್ಚಿನ ಗೌರವ ಕೊಡುತ್ತೇನೆ. ಆದರೆ ನಮಗೆ ಅಷ್ಟು ಸಾಧಿಸಲು ಸಾಧ್ಯವಾಗಿಲ್ಲವೆಂಬುದಕ್ಕೆ ಬೇಸರ, ದುಗುಡ, ನಾಚಿಕೆಯಿದೆ" ಎಂದು ರತನ್ ಟಾಟಾ ಹೇಳಿದ್ದಾರೆ. ನಮಗಿಂತ ಮಹೀಂದ್ರ ಕಂಪನಿಯು ಯಾಕೆ ಮುಂದಿದೆ ಎಂದು ಆತ್ಮವಿಮರ್ಶೆ ಮಾಡಿಕೊಳ್ಳುವುದು ಸೂಕ್ತವೆಂದು ಟಾಟಾ ಅಭಿಪ್ರಾಯಪಟ್ಟಿದ್ದಾರೆ.

ಪ್ರಸಕ್ತ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಮಹೀಂದ್ರ ಆಂಡ್ ಮಹೀಂದ್ರ ಕಂಪನಿಯು ಪ್ರಪ್ರಥಮ ಬಾರಿಗೆ ಪ್ರಯಾಣಿಕ ವಾಹನ ಮಾರುಕಟ್ಟೆಯಲ್ಲಿ ಟಾಟಾ ಮೋಟರ್ಸ್ ನ್ನು ಹಿಂದಿಕ್ಕಿದೆ. ಈ ಸಮಯದಲ್ಲಿ ಮಹೀಂದ್ರ ಕಂಪನಿಯು 61,504 ವಾಹನ ಮಾರಾಟ ಮಾಡಿದರೆ, ಟಾಟಾ ಮೋಟರ್ಸ್ 60,405 ಯುನಿಟ್ ವಾಹನ ಮಾರಾಟ ಮಾಡಿದೆ.

2012ನೇ ಆರ್ಥಿಕ ವರ್ಷದಲ್ಲಿ ಟಾಟಾ ಮೋಟರ್ಸ್ ಮೂರನೇ ಸ್ಥಾನವನ್ನು ಮರಳಿ ಪಡೆದಿತ್ತು. ಆದರೆ ಈ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕೆಲವು ಸಾವಿರ ಕಾರುಗಳ ಅಂತರದಲ್ಲಿ ಮಹೀಂದ್ರ ಮೂರನೇ ಸ್ಥಾನ ಪಡೆದಿದೆ. ಟಾಟಾ ಮೋಟರ್ಸ್ ನಾಲ್ಕನೇ ಸ್ಥಾನಕ್ಕೆ ಸರಿದಿದೆ.

"ಸೋಲುಗಳು ನಾವು ಎಡವಿಬೀಳಲು ಅವಕಾಶ ನೀಡಬಹುದು" ಎಂದ ರತನ್ ಟಾಟಾ "ನಮ್ಮೆಲ್ಲ ಉದ್ಯೋಗಿಗಳು ಈ ಬದಲಾವಣೆಯ ಸಮಯದಲ್ಲಿ ಹೆಚ್ಚು ಸ್ಪಿರಿಟಿನಿಂದ ಕಂಪನಿಯನ್ನು ಮೇಲೆ ತರಲು ಯತ್ನಿಸುತ್ತಾರೆ ಎಂಬ ಭರವಸೆ ನನಗಿದೆ" ಎಂದರು.