ಹಬ್ಬದ ಸಂಭ್ರಮ; ಆಕಾಶಕ್ಕೆ ನೆಗೆದ ಕಾರು ಮಾರಾಟ

ಹಬ್ಬದ ಸಂಭ್ರಮದ ವೇಳಯಲ್ಲಿ ಬಹುತೇಕ ಮಂದಿ ಹೊಸ ಕಾರು ಖರೀದಿಸಲು ಉತ್ಸುಕತೆಯನ್ನು ತೋರುತ್ತಾರೆ. ಸಹಜವಾಗಿಯೇ ಇದು ಮಾರಾಟದ ಮೇಲೂ ಪರಿಣಾಮ ಬೀರುತ್ತದೆ. ಇದರಿಂದಾಗಿ ವಾಹನ ಸಂಸ್ಥೆಗಳು ಬೇಡಿಕೆಯನ್ನು ಪೂರೈಸಲು ಹೆಚ್ಚುವರಿ ಕೆಲಸದ ವೇಳಾಪಟ್ಟಿಯನ್ನು ಘೋಷಿಸುವುದು ಅನಿವಾರ್ಯವೆನಿಸಿದೆ.

ಭಾರತೀಯ ವಾಹನ ಅಧ್ಯಯನ ಸಂಸ್ಥೆ (ಸಿಯಾಮ್) ಬಿಡುಗಡೆ ಮಾಡಿರುವ ವರದಿಗಳ ಪ್ರಕಾರ 2016 ಸೆಪ್ಟೆಂಬರ್ ತಿಂಗಳಲ್ಲಿ 1.95 ಲಕ್ಷ ಕಾರುಗಳ ಮಾರಾಟ ಕಂಡಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಈ ಸಂಖ್ಯೆ 1.69 ಲಕ್ಷ ಯುನಿಟ್ ಗಳಾಗಿದ್ದವು. ತನ್ಮೂಲಕ ಶೇಕಡಾ 15ರಷ್ಟು ಮಾರಾಟ ಏರಿಕೆ ದಾಖಲಿಸಿದೆ.

ಕೆಲವು ವರ್ಷಗಳ ಹಿಂದೆ 2012ರಲ್ಲಿ ಮಾರಾಟ ಸಂಖ್ಯೆಯು 2.33 ಲಕ್ಷವನ್ನು ತಲುಪಿದೆ. ತದಾ ಬಳಿಕ ಇದೇ ಮೊದಲ ಬಾರಿಗೆ ಮಾರಾಟದಲ್ಲಿ ಇಂತಹದೊಂದು ಭಾರಿ ಪ್ರಮಾಣದ ನೆಗೆತ ಕಂಡಿದೆ.

ಎಸ್ ಯುವಿ, ವ್ಯಾನ್ ಸೇರಿದ ಪ್ರಯಾಣಿಕ ಕಾರುಗಳ ಮಾರಾಟವು 2.78 ಲಕ್ಷ ಯುನಿಟ್ ಗಳಾಗಿವೆ. ಇದು ಕಳೆದ ವರ್ಷ ಇದೇ ಸಂದರ್ಭದಲ್ಲಿ 2.32 ಲಕ್ಷ ಯುನಿಟ್ ಗಳಾಗಿತ್ತು. ಈ ಮೂಲಕ ಶೇಕಡಾ 20ರಷ್ಟು ಏರಿಕೆ ಕಂಡಿದೆ. 2012ರಲ್ಲಿ ಈ ಸಂಖ್ಯೆಯು 2.95 ಲಕ್ಷದಷ್ಟಾಗಿತ್ತು.

ಇದೇ ಮೊದಲ ಬಾರಿಗೆ ಕ್ರೀಡಾ ಬಳಕೆಯ ವಾಹನ ವಿಭಾಗದಲ್ಲಿ ಭಾರಿ ನೆಗೆತ ಕಂಡಿದ್ದು, ಸೆಪ್ಟೆಂಬರ್ ತಿಂಗಳಲ್ಲಿ 66,851 ಯುನಿಟ್ ಗಳಷ್ಟು ಮಾರಾಟ ಕಂಡಿತ್ತು.

ಪಟ್ಟಣ ಸೇರಿದಂತೆ ಗ್ರಾಮೀಣ ಪ್ರದೇಶದಲ್ಲೂ ಗರಿಷ್ಠ ಮಾರಾಟ ದಾಖಲಾಗಿದೆ. ಒಟ್ಟಿನಲ್ಲಿ ಹಬ್ಬದ ಸಂಭ್ರಮದ ವಾತಾವರಣವು ಗ್ರಾಹಕರಲ್ಲೂ ಮನೆ ಮಾಡಿದೆ.