ಹಿರಿಯ ನಾಗರಿಕರಿಗೆ ಭರ್ಜರಿ ಡಿಸ್ಕೌಂಟ್ ಘೋಷಿಸಿದ ಓಲಾ ಕ್ಯಾಬ್..!

ಇಷ್ಟು ದಿನಗಳ ಕಾಲ ನಾವು ಸರ್ಕಾರಿ ಬಸ್, ರೈಲ್ಪೆಗಳಲ್ಲಿ ಮಾತ್ರ ಹಿರಿಯ ನಾಗರಿಕರಿಗೆ ಪ್ರಯಾಣ ದರದಲ್ಲಿ ಡಿಸ್ಕೌಂಟ್ ನೀಡುತ್ತಿರುವುದನ್ನು ಕೇಳಿದ್ದೇವೆ. ಆದ್ರೆ ಆ್ಯಪ್ ಆಧರಿತ ಕ್ಯಾಬ್ ಸೇವೆಗಳನ್ನು ಒದಗಿಸುವಲ್ಲಿ ಮುಂಚೂಣಿಯಲ್ಲಿರುವ ಓಲಾ ಸಂಸ್ಥೆ ಕೂಡಾ ಡಿಸ್ಕೌಂಟ್ ಘೋಷಣೆ ಮಾಡಿದೆ.

60 ವರ್ಷಕ್ಕಿಂತ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಪ್ರಯಾಣದ ದರದಲ್ಲಿ ಶೇ.20ರಷ್ಟು ಡಿಸ್ಕೌಂಟ್ ಘೋಷಣೆ ಮಾಡಲಾಗಿದ್ದು, ಓಲಾ ಕ್ಯಾಬ್ ಸೇವೆಗಳನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಮಹತ್ವದ ನಿರ್ಧಾರ ಕೈಗೊಳ್ಳಲಾಗಿದೆ.

ಆದ್ರೆ ಹೊಸ ಯೋಜನೆಯನ್ನು ಮೊದಲ ಹಂತದಲ್ಲಿ ನಾಗ್ಪುರ್ ಸೇರಿದಂತೆ ದೆಹಲಿ, ಅಹಮ್ಮದಾಬಾದ್ ಮಾತ್ರ ಜಾರಿಗೊಳಿಸಲಾಗಿದ್ದು, ತದನಂತರವಷ್ಟೇ ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಜಾರಿಗೆ ತರಲಾಗುತ್ತಿದೆ.

ಒಂದು ತಿಂಗಳ ಅವಧಿಯಲ್ಲಿ ಹತ್ತು ಬಾರಿ ಮಾತ್ರ ಈ ಡಿಸ್ಕೌಂಟ್ ಅನ್ವಯವಾಗಲಿದ್ದು, ತದನಂತರ ಬುಕ್ ಮಾಡುವ ಕ್ಯಾಬ್ ಸೇವೆಗಳಿಗೆ ಸಾಮನ್ಯ ದರಗಳನ್ನು ಪಾವತಿಸಬೇಕಾಗುತ್ತದೆ.

ಸದ್ಯ ಓಲಾ ಆಟೋಗಳಲ್ಲಿ ಈ ಡಿಸ್ಕೌಂಟ್ ಯೋಜನೆ ಜಾರಿಯಲ್ಲಿದ್ದು, ಹಿರಿಯ ನಾಗರಿಕರಿಗೆ ಪ್ರಯಾಣದ ದರದಲ್ಲಿ ಶೇ.15 ರಿಯಾಯ್ತಿ ದೊರೆಯುತ್ತಿವೆ. ಆದ್ರೆ ಈ ಯೋಜನೆ ಕೂಡಾ ಬೆಂಗಳೂರಿನಲ್ಲಿ ಲಭ್ಯವಿಲ್ಲ.

ಮುಂಬೈ, ಪುಣೆ, ಅಹಮ್ಮದಬಾದ್, ನಾಗ್ಪುರ್, ಇಂಧೋರ್ ಮತ್ತು ಭೂಪಾಲ್‌ನಲ್ಲಿ ಮಾತ್ರ ಡಿಸ್ಕೌಂಟ್ ಆಟೋ ಸೇವೆಗಳು ಲಭ್ಯವಿದ್ದು, ಬೆಂಗಳೂರಿನಲ್ಲೂ ಹಿರಿಯರ ನಾಗರಿಕರಿಗೆ ಡಿಸ್ಕೌಂಟ್ ಸೇವೆಗಳು ಸದ್ಯದ್ಲಲೇ ಲಭ್ಯವಾಗುವ ಸಾಧ್ಯತೆಗಳಿವೆ.

ಒಟ್ಟಿನಲ್ಲಿ ದೇಶಿಯಾಗಿ ಕ್ಯಾಬ್ ಸೇವೆಗಳನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಈ ಯೋಜನೆ ಕೈಗೊಂಡಿರುವ ಓಲಾ, ಹಿರಿಯ ನಾಗರಿಕರಿಗೆ ಡಿಸ್ಕೌಂಟ್ ನೀಡುತ್ತಿರುವುದು ಒಳ್ಳೆಯ ವಿಚಾರ.