ಇಸ್ರೋದಿಂದ ಸ್ಕ್ರಾಮ್ ಜೆಟ್ ರಾಕೆಟ್ ಎಂಜಿನ್ ಯಶಸ್ವಿ ಉಡಾವಣೆ

ಎರಡು ಸ್ಕ್ರಾಮ್ ಜೆಟ್ ಎಂಜಿನ್ ಗಳನ್ನು ಆಳವಡಿಸಲಾಗಿದ್ದ 3277 ಕೆ.ಜಿ. ತೂಕದ ರಾಕೆಟ್ ಬೂಸ್ಟರ್ ಅಡ್ವಾನ್ಸ್ಡ್ ಟೆಕ್ನಾಲಜಿ ವೆಹಿಕಲ್ (ಎಟಿವಿ) ಪರೀಕ್ಷೆ ನಡೆಸಲಾಗಿದೆ.

ಗಾಳಿ ಉಸಿರಾಟ ತಳ್ಳುವಿಕೆ ಸಿದ್ಧಾಂತದ ಮುಖಾಂತರ ಜಲಜನಕವನ್ನು ಇಂಧನವನ್ನಾಗಿ ಹಾಗೂ ಉತ್ಕರ್ಷಣೆಗಾಗಿ ವಾತಾವರಣದಲ್ಲಿರುವ ಆಮ್ಲಜನಕವನ್ನು ಬಳಕೆ ಮಾಡಲಿದೆ.

ಎರಡು ಸ್ಕ್ರಾಮ್ ಜೆಟ್ ಎಂಜಿನ್ ಹೊತ್ತೊಯ್ದಿರುವ ಎಟಿವಿ ವಾಹನವು 300 ಸೆಕೆಂಡುಗಳ ಹಾರಾಟದ ಬಳಿಕ ಶ್ರೀಹರಿಕೋಟಾದಿಂದ ಸರಿ ಸುಮಾರು 320 ಕೀ.ಮೀ. ದೂರದಲ್ಲಿರುವ ಬಂಗಾಳ ಕೊಲ್ಲಿಯಲ್ಲಿ ಮುಳುಗಡೆಗೊಂಡಿತ್ತು.

ಸೂಪರ್ ಸಾನಿಕ್ ಕಂಬಸ್ಟಿಂಗ್ ರಾಮ್ ಜೆಟ್ ಇಂಧನವನ್ನು ಸಂಕ್ಷಿಪ್ತ ರೂಪದಲ್ಲಿ ಸ್ಕ್ರಾಮ್ ಜೆಟ್ ಎನ್ನಲಾಗುತ್ತಿದ್ದು, ಇಸ್ರೋ ಮರು ಬಳಕೆ ವಾಹನ ತಂತ್ರಜ್ಞಾನದಲ್ಲೂ ನಿರ್ಣಾಯಕ ಪಾತ್ರ ವಹಿಸಲಿದೆ.

ರಾಕೆಟ್ ಉಡಾವಣಾ ವೆಚ್ಚವನ್ನು ಕಡಿಮೆ ಮಾಡುವುದು ಸ್ಕ್ರಾಮ್ ಜೆಟ್ ಎಂಜಿನ್ ನ ಪ್ರಮುಖ ವೈಶಿಷ್ಟ್ಯವಾಗಿದೆ. ಅಲ್ಲದೆ ಎಲ್ಲ ತಾಂತ್ರಿಕ ಅಡೆ ತಡೆಗಳನ್ನು ಸಮರ್ಥವಾಗಿ ಎದುರಿಸಿದೆ.

ಸ್ಕ್ರಾಮ್ ಜೆಟ್ ಎಂಜಿನನ್ನು ಭವಿಷ್ಯದ ಉಡಾವಣಾ ತಂತ್ರಜ್ಞಾನವೆಂದು ಬಿಂಬಿಸಲಾಗುತ್ತದೆ. ಇದನ್ನು ರಾಕೆಟ್ ಉಡಾವಣೆಯ ವಾತಾವರಣದ ಹಂತದಲ್ಲಿ ಬಳಕೆ ಮಾಡಲಾಗುತ್ತದೆ.

ಇಸ್ರೋ ಸ್ಕ್ರಾಮ್ ಜೆಟ್ ಎಂಜಿನ್ ಅಲ್ಪ ದೂರದ ವರೆಗೆ ಮಾತ್ರ ಪರೀಕ್ಷೆ ನಡೆಸಿದ್ದರೂ ಶಬ್ದ ವೇಗಕ್ಕಿಂತಲೂ ಆರು ಪಟ್ಟು (ಮ್ಯಾಕ್ 6) ಹೆಚ್ಚು ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯವನ್ನು ಹೊಂದಿರುತ್ತದೆ.

ಇಸ್ರೋ ಸದ್ಯಕ್ಕೆ ಉಪಗ್ರಹಗಳ ಉಡಾವಣೆಗೆ ಪಿಎಸ್ ಎಲ್ ವಿ ಬಳಕೆ ಮಾಡುತ್ತಿದೆ. ಭವಿಷ್ಯದ ಮರುಬಳಕೆ ಉಡ್ಡಯನ ವಾಹನ 'ಅವತಾರ್' ಉಪಗ್ರಹವನ್ನು ಆಕಾಶಕ್ಕೆ ಸೇರಿಸಿ ಮರಳಿ ಲ್ಯಾಂಡ್ ಆಗಲಿದೆ.