ಟಿವಿಎಸ್ ಬಹುನೀರಿಕ್ಷಿತ ಅಪಾಚೆ ಆರ್‌ಟಿಆರ್ 180 ರೇಸ್ ಎಡಿಷನ್ ಬಿಡುಗಡೆ

ರೆಗ್ಯುಲರ್ ಮಾದರಿಗಿಂತ ವಿನ್ಯಾಸದಲ್ಲಿ ಗುರುತರ ಬದಲಾವಣೆಗಳನ್ನು ಪಡೆದುಕೊಂಡಿರುವ ಅಪಾಚೆ ಆರ್‌ಟಿಆರ್ 180 ರೇಸ್ ಎಡಿಷನ್ ಬೈಕ್‌ಗಳು ದೆಹಲಿ ಎಕ್ಸ್‌ಶೋರಂ ಪ್ರಕಾರ ರೂ. 83,233 ಬೆಲೆ ಹೊಂದಿದ್ದು, ಬೈಕಿನ ಹೊರ ವಿನ್ಯಾಸ ಹೆಚ್ಚಿಸಲು ಬೈಕಿನ ಮಡ್ ಗಾರ್ಡ್ ಮೇಲೆ ಬಳೆಯಲಾಗಿರುವ ಪರ್ಲ್ ವೈಟ್ ಮತ್ತು ರೆಡ್ ಸ್ಟ್ರಿಪ್‌ಗಳು ಬೈಕಿಗೆ ರಗಡ್ ಲುಕ್ ನೀಡಿವೆ.

ಜೊತೆಗೆ ಇಂಧನ ಟ್ಯಾಂಕ್ ಮತ್ತು ರಿಯರ್ ಕೌಲ್ ಮೇಲೂ ಪರ್ಲ್ ವೈಟ್ ಮತ್ತು ರೆಡ್ ಸ್ಟ್ರಿಪ್‌ ಬಳಕೆ ಮಾಡಲಾಗಿದ್ದು, ಹೆಸರಿಗೆ ತಕ್ಕಂತೆ ಹೊಸ ಬೈಕ್ ಮಾದರಿಯನ್ನು ಸ್ಪೋರ್ಟಿ ವಿನ್ಯಾಸಗಳೊಂದಿಗೆ ಅಭಿವೃದ್ಧಿಗೊಳಿಸಲಾಗಿದೆ.

ಜೊತೆಗೆ ಹೊಸ ಬೈಕ್‌ಗಳಲ್ಲಿ 3ಡಿ ಟಿವಿಎಸ್ ಲೊಗೊ, ರೇಸಿಂಗ್ ಬ್ರಾಂಡ್ ರಿಮ್ ಸ್ಟಿಕ್ಕರಿಂಗ್ ಅಲಾಯ್ ಚಕ್ರಗಳು ಮುಂತಾದ ಫೀಚರ್‌ಗಳನ್ನು ಪಡೆದಿದ್ದು, ಸುರಕ್ಷತೆಗಾಗಿ ಎರಡು ಬದಿಯ ಚಕ್ರಗಳಲ್ಲೂ ಡಿಸ್ಕ್ ಬ್ರೇಕ್ ಸೌಲಭ್ಯವನ್ನು ಸೇರಿಸಲಾಗಿದೆ.

ಹಾಗೆಯೇ ಡಿಜಿಟಲ್ ಡ್ಯಾಶ್‌ಬೋರ್ಡ್‌ನಲ್ಲಿ ವೇಗಮಾಪಕ, ಲ್ಯಾಪ್ ಟೈಮರ್, ಸರ್ವಿಸ್ ಇಂಡಿಕೇಟರ್ ಇತ್ಯಾದಿ ಸೌಲಭ್ಯಗಳನ್ನು ಪಡೆಯಲಿದ್ದು, ಒಟ್ಟಾರೆ ವಿನ್ಯಾಸಗಳನ್ನು ಗಮನಿಸಿದ್ದಲ್ಲಿ ತಾಂತ್ರಿಕ ಅಂಶಗಳನ್ನು ಹೊರತುಪಡಿಸಿ ಸಾಮಾನ್ಯ ಅಪಾಚೆ ಆರ್‌ಟಿಆರ್ 180 ಬೈಕ್‌ಗಿಂತ ಇದು ಕೊಂಚ ಭಿನ್ನತೆ ಪಡೆದಿದೆ.

ಎಂಜಿನ್ ಸಾಮರ್ಥ್ಯ

ಅಪಾಚೆ ಆರ್‍‍‍ಟಿಆರ್ 180 ರೇಸ್ ಎಡಿಷನ್ ಬೈಕ್‍‍ಗಳು 177.4 ಸಿಸಿ ಸಿಂಗಲ್ ಸಿಲಿಂಡರ್, ಏರ್ ಕೂಲ್ಡ್ ಎಂಜಿನ್ ಸಹಾಯದಿಂದ 16.3-ಬಿಹೆಚ್‍ಪಿ ಹಾಗು 15.5-ಎನ್ಎಂ ಟಾರ್ಕ್‍ ಅನ್ನು ಉತ್ಪಾದಿಸುವ ಶಕ್ತಿಯನ್ನು ಪಡೆದಿದ್ದು, 5 ಸ್ಪೀಡ್ ಗೇರ್‍‍ಬಾಕ್ಸ್ ನೊಂದಿಗೆ ಜೋಡಿಸಲಾಗಿದೆ.

ಈ ಮೂಲಕ ಉತ್ತಮ ಪವರ್ ಉತ್ಪಾದನೆ ಮಾಡುವ ಅಪಾಚೆ ಆರ್‌ಟಿಆರ್ 180 ರೇಸ್ ಎಡಿಷನ್‌ಗಳು ಕೇವಲ 4.96 ಸೆಕೆಂಡುಗಳಲ್ಲೇ 60 ಕೀ.ಮೀ. ವೇಗವರ್ಧನೆ ಮಾಡುವ ಗುಣಹೊಂದಿದ್ದು, ಜೊತೆಗೆ ಬೆಸ್ಟ್ ಇನ್ ಕ್ಲಾಸ್ 'ಪವರ್-ಟು-ವೇಟ್' ಅನುಪಾತ ಪಡೆದಿವೆ.

ಹೀಗಾಗಿ ಕಡಿಮೆ ದರಗಳಲ್ಲಿ ರೇಸ್ ಎಡಿಷನ್ ಬೈಕ್ ಇಷ್ಟಪಡುವ ಗ್ರಾಹಕರಿಗೆ ಇದು ಇಷ್ಟವಾಗಲಿದ್ದು, ಫ್ರಂಟ್ ಎಂಡ್ ಶಾರ್ಪ್ ಹೆಡ್‌ಲ್ಯಾಂಪ್ ವಿನ್ಯಾಸಗಳು ಮತ್ತು ಸುರಕ್ಷೆತೆಗಾಗಿ ಎರಡು ಬದಿಯ ಚಕ್ರಗಳಲ್ಲೂ ನೀಡಲಾಗಿರುವ ಡಿಸ್ಕ್ ಬ್ರೇಕ್ ಆಯ್ಕೆಯೂ ಬೈಕಿನ ವಿಶೇಷತೆಯನ್ನು ಹೆಚ್ಚಿಸಿದೆ.

ಒಟ್ಟಿನಲ್ಲಿ ಅಪಾಚೆ ಆರ್‌ಟಿಆರ್ 200 4ವಿ ರೇಸ್ ಎಡಿಷನ್ , ಅಪಾಚೆ ಆರ್‌ಟಿಆರ್ 160 ರೇಸ್ ಎಡಿಷನ್ ಬಿಡುಗಡೆ ಮಾಡುವ ಮೂಲಕ ಗ್ರಾಹಕರನ್ನು ಕುತೂಹಲ ಹುಟ್ಟುಹಾಕಿದ್ದ ಟಿವಿಎಸ್ ಸಂಸ್ಥೆಯು ಇದೀಗ ಅಪಾಚೆ ಆರ್‌ಟಿಆರ್ 180 ರೇಸ್ ಎಡಿಷನ್ ಬಿಡುಗಡೆ ಮಾಡಿರುವುದು ಪ್ರಮುಖ ಬೈಕ್ ಮಾದರಿಗಳಿಗೆ ತೀವ್ರ ಪೈಪೋಟಿ ನೀಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.