ಮೇಡ್ ಇನ್ ಇಂಡಿಯಾ ಎಲೆಕ್ಟ್ರಿಕ್ ಸೈಕಲ್‌ಗಳ ಬುಕ್ಕಿಂಗ್ ಆರಂಭಿಸಿದ ನಹಾಕ್ ಮೋಟಾರ್ಸ್

ಗರುಡ ಸೈಕಲ್ ಬೆಲೆ ರೂ.31,999ಗಳಾದರೆ, ಜಿಪ್ಪಿ ಸೈಕಲ್ ಬೆಲೆ ರೂ.33,499ಗಳಾಗಿದೆ. ಕಂಪನಿಯು ಈ ಸೈಕಲ್‌ಗಳಿಗಾಗಿ ದೇಶಾದ್ಯಂತ ಬುಕ್ಕಿಂಗ್'ಗಳನ್ನು ಆರಂಭಿಸಿದೆ. ಮೊದಲ ಹಂತದ ಬುಕ್ಕಿಂಗ್ ಜುಲೈ 2ರಿಂದ ಜುಲೈ 11ರವರೆಗೆ ತೆರೆದಿರುತ್ತದೆ.

ಈ ಸೈಕಲ್‌ಗಳನ್ನು ಖರೀದಿಸ ಬಯಸುವವರು ನಹಾಕ್ ಮೋಟರ್ಸ್ ಕಂಪನಿಯ ವೆಬ್ ಸೈಟ್'ನಲ್ಲಿ ಬುಕ್ ಮಾಡಬಹುದು. ಗ್ರಾಹಕರು www.nahakmotors.eco ವೆಬ್ ಸೈಟ್'ಗೆ ತೆರಳಿ ತಮ್ಮ ಇಷ್ಟದ ಮಾದರಿಯನ್ನು ಆಯ್ಕೆ ಮಾಡಿಕೊಳ್ಳಬಹುದು.

ಗ್ರಾಹಕರು ರೂ.2999 ಪಾವತಿಸಿ ಈ ಸೈಕಲ್‌ಗಳನ್ನು ಬುಕ್ಕಿಂಗ್ ಮಾಡಬಹುದು. ನಹಾಕ್ ಮೋಟಾರ್ಸ್ ಕಂಪನಿಯು ಜುಲೈ 13ರ ವೇಳೆಗೆ ಈ ಎಲೆಕ್ಟ್ರಿಕ್ ಸೈಕಲ್‌ಗಳನ್ನು ಬುಕ್ಕಿಂಗ್ ಮಾಡಿರುವವರ ಪಟ್ಟಿಯನ್ನು ಸಿದ್ದಪಡಿಸಿಕೊಳ್ಳಲಿದೆ.

ಬುಕ್ಕಿಂಗ್ ಪ್ರಕ್ರಿಯೆ ಪೂರ್ಣಗೊಂಡ ನಂತರ ಆಗಸ್ಟ್ 15ರಿಂದ ಈ ಸೈಕಲ್‌ಗಳ ಹೋಂ ಡೆಲಿವರಿಯನ್ನು ಆರಂಭಿಸಲಾಗುತ್ತದೆ. ಈ ಎರಡೂ ಮಾದರಿಗಳು ಹೊಸ ತೆಗೆಯಬಹುದಾದ ಬ್ಯಾಟರಿ, ಎಲ್‌ಸಿ‌ಡಿ ಡಿಸ್ ಪ್ಲೇ, ಪೆಡಲ್ ಸೆನ್ಸಾರ್'ನಂತಹ ಹಲವಾರು ಸುಧಾರಿತ ಫೀಚರ್'ಗಳನ್ನು ಹೊಂದಿವೆ.

ಈ ಸೈಕಲ್‌ಗಳಲ್ಲಿ ಅಳವಡಿಸಿರುವ ಬ್ಯಾಟರಿ ಪೂರ್ತಿಯಾಗಿ ಚಾರ್ಜ್ ಆಗಲು ಸುಮಾರು 3 ಗಂಟೆ ಬೇಕಾಗುತ್ತದೆ. ಚಾರ್ಜರ್ ಅನ್ನು ಸಾಮಾನ್ಯ ಎಲೆಕ್ಟ್ರಿಕ್ ಸಾಕೆಟ್‌ಗೆ ಪ್ಲಗ್ ಮಾಡುವ ಮೂಲಕ ಈ ಬ್ಯಾಟರಿಯನ್ನು ಪೂರ್ತಿಯಾಗಿ ಚಾರ್ಜ್ ಮಾಡಬಹುದು.

ಈ ಎಲೆಕ್ಟ್ರಿಕ್ ಸೈಕಲ್‌ಗಳು ಪೂರ್ತಿಯಾಗಿ ಚಾರ್ಜ್ ಆದ ನಂತರ ಸುಮಾರು 40 ಕಿ.ಮೀ ಸಂಚರಿಸಬಲ್ಲವು. ಈ ಎಲೆಕ್ಟ್ರಿಕ್ ಸೈಕಲ್‌ಗಳನ್ನು ರಸ್ತೆಗಳಲ್ಲಿ ಚಾಲನೆ ಮಾಡಲು ಡ್ರೈವಿಂಗ್ ಲೈಸೆನ್ಸ್'ನ ಅಗತ್ಯವಿಲ್ಲ.

ಈ ಎಲೆಕ್ಟ್ರಿಕ್ ಸೈಕಲ್‌ಗಳನ್ನು ಚಾಲನೆ ಮಾಡಲು ಪ್ರತಿ ಕಿ.ಮೀಗೆ ಕೇವಲ 10 ಪೈಸೆ ಖರ್ಚಾಗುತ್ತದೆ ಎಂದು ಎಂದು ನಹಾಕ್ ಮೋಟಾರ್ಸ್ ಕಂಪನಿ ಹೇಳಿಕೊಂಡಿದೆ. ಕಂಪನಿಯ ಹೋಂ ಡೆಲಿವರಿ ಕಲ್ಪನೆ ಬಗ್ಗೆ ನಹಾಕ್ ಗ್ರೂಪ್‌ನ ಅಧ್ಯಕ್ಷರಾದ ಡಾ.ಪ್ರವತ್ ನಹಾಕ್ ಮಾಹಿತಿ ನೀಡಿದ್ದಾರೆ.

ನಾವು ಈ ವರ್ಷದ ಆರಂಭದಲ್ಲಿ ನಮ್ಮ ಎಲೆಕ್ಟ್ರಿಕ್ ಸೈಕಲ್‌ಗಳನ್ನು ಆರಂಭಿಸಿದೆವು. ಆಗಿನಿಂದ ಸಾಕಷ್ಟು ಜನರು ಈ ಸೈಕಲ್‌ಗಳ ಬಗ್ಗೆ ವಿಚಾರಿಸಿದ್ದಾರೆ. ಆದರೆ ಕೋವಿಡ್ 19 ಕಾರಣದಿಂದಾಗಿ ಈ ಸೈಕಲ್‌ಗಳ ಉತ್ಪಾದನೆಯನ್ನು ನಿಧಾನಗೊಳಿಸಲಾಗಿತ್ತು.

ಎಲೆಕ್ಟ್ರಿಕ್ ಸೈಕಲ್‌ಗಳಿಗೆ ಭಾರಿ ಬೇಡಿಕೆಯಿದ್ದು, ಅವುಗಳನ್ನು ಗ್ರಾಹಕರ ಮನೆ ಬಾಗಿಲಿಗೆ ತಲುಪಲು ನಾವು ನಿರ್ಧರಿಸಿದ್ದೇವೆ. ಆಗಸ್ಟ್ 15ರಿಂದ ಗ್ರಾಹಕರ ಮನೆ ಬಾಗಿಲಿಗೆ ನಾವು ಈ ಎಲೆಕ್ಟ್ರಿಕ್ ಸೈಕಲ್‌ಗಳನ್ನು ತಲುಪಿಸಲಿದ್ದೇವೆ ಎಂದು ಹೇಳಿದರು.