ಬೆಂಗ್ಳೂರಿನ ಕುಡುಕರೆಲ್ಲ ನೆಟ್ಟಗಾಗಿ ಬಿಟ್ರೆ? ಡ್ರಿಂಕ್ ಆಂಡ್ ಡ್ರೈವ್‌ನಲ್ಲಿ ಭಾರಿ ಇಳಿಕೆ

ವರದಿಗಳ ಪ್ರಕಾರ ಪ್ರಸಕ್ತ ಸಾಲಿನ ಮೊದಲ ಮೂರು ತಿಂಗಳಲ್ಲಿ ಬೆಂಗಳೂರು ಟ್ರಾಫಿಕ್ ಪೊಲೀಸ್ ಡ್ರಿಂಕ್ ಆಂಡ್ ಡ್ರೈವ್ ತಪ್ಪಿಗಾಗಿ ಮಾಸಿಕ ಸರಾಸರಿ 5,000 ದೂರುಗಳನ್ನು ದಾಖಲಿಸಿಕೊಳ್ಳುತ್ತಿದ್ದವು.

ಎಪ್ರಿಲ್ ತಿಂಗಳಾಗುವಾಗ ಡ್ರಿಂಕ್ ಆಂಡ್ ಡ್ರೈವ್ ದೂರುಗಳ ಸಂಖ್ಯೆ 3,434ಕ್ಕೆ ಇಳಿಕೆಯಾಗಿದೆ. ಈ ಸಂಖ್ಯೆಯು ಮೇ ತಿಂಗಳಾಗುವಾಗ ಕೇವಲ 1,829ಕ್ಕೆ ಬಂದಿಳಿದಿದೆ. ತನ್ಮೂಲಕ ಪಾನಮತ್ತ ಚಾಲನೆಯ ದೂರುಗಳ ಸಂಖ್ಯೆ ಶೇಕಡಾ 60ರಷ್ಟು ಇಳಿಕೆಯಾಗಿದೆ.

ಡ್ರಿಂಕ್ ಆಂಡ್ ಡ್ರೈವ್ ದೂರುಗಳ ಸಂಖ್ಯೆಯಲ್ಲಿ ಉಂಟಾಗಿರುವ ಗಣನೀಯ ಪ್ರಮಾಣದ ಕುಸಿತದಿಂದಾಗಿ ಟ್ರಾಫಿಕ್ ಪೊಲೀಸ್ ವಿಭಾಗ ಸಹ ಆಶ್ಚರ್ಯಚಕಿತಗೊಂಡಿದೆ.

ವಾರಂತ್ಯದ ಶನಿವಾರದಂದು ಪೊಲೀಸರು 1,000ಕ್ಕೂ ಹೆಚ್ಚು ದೂರುಗಳನ್ನು ದಾಖಲಿಸುತ್ತಿದ್ದರು. ಈ ಪ್ರಮಾಣವೀಗ 500ಕ್ಕೆ ಇಳಿಕೆಯಾಗಿದೆ. ಕೆಲವು ಪಬ್ ಗಳಲ್ಲಿ ಗ್ರಾಹಕರು ಮನೆಗೆ ಸುರಕ್ಷಿತವಾಗಿ ತಲುಪಲು ವೈಯಕ್ತಿಕ ವಾಹನಗಳ ಬದಲಾಗಿ ಕ್ಯಾಬ್ ಗಳನ್ನು ಏರ್ಪಡಿಸುತ್ತಿರುವುದು ಸಹ ಕುಡಿದು ವಾಹನ ಚಲಾಯಿಸುವ ಸಂಖ್ಯೆಗಳಲ್ಲಿ ಇಳಿಕೆಯಾಗಲು ಕಾರಣವಾಗಿದೆ.

ತಡ ರಾತ್ರಿಯಲ್ಲಿ ಮದ್ಯ ಕುಡಿದು ವಾಹನ ಚಾಲನೆ ಮಾಡುವುದು ನಿಜಕ್ಕೂ ಅಪಾಯಕಾರಿಯಾಗಿದ್ದು, ನೀವು ಅವಘಡಕ್ಕೆ ಸಿಲುಕುವುದಲ್ಲದೆ ಅಜಾಗರೂಕ ಚಾಲನೆಯಿಂದಾಗಿ ಇತರ ವಾಹನಗಳಿಗೂ ಅವಘಡ ತಪ್ಪಿದ್ದಲ್ಲ.