ಮಹೀಂದ್ರ ಸ್ಕಾರ್ಪಿಯೊಗೆ ಸಬ್ 2 ಲೀಟರ್ ಡೀಸೆಲ್ ಎಂಜಿನ್

ಮಹೀಂದ್ರ ಆಂಡ್ ಮಹೀಂದ್ರ ಸಂಸ್ಥೆಯ ಹೆಸರಾಂತ ಮಾದರಿಗಳಾದ ಸ್ಕಾರ್ಪಿಯೊ ಹಾಗೂ ಎಕ್ಸ್‌ಯುವಿ500 ಅತಿ ಶೀಘ್ರದಲ್ಲೇ ಸಬ್ 2 ಲೀಟರ್ ಡೀಸೆಲ್ ಎಂಜಿನ್ ಪಡೆದುಕೊಳ್ಳಲಿದೆ.

ರಾಷ್ಟ್ರ ರಾಜಧಾನಿಯಲ್ಲಿ ನವದೆಹಲಿಯಲ್ಲಿ ಎರಡು ಲೀಟರ್ ಗೂ ಹೆಚ್ಚು ಸಾಮರ್ಥ್ಯದ ಡೀಸೆಲ್ ಎಂಜಿನ್ ಗಳನ್ನು ನಿಷೇಧಿಸಿರುವ ಕೋರ್ಟ್ ಕ್ರಮದ ಹಿನ್ನೆಲೆಯಲ್ಲಿ ಮಹೀಂದ್ರ ಇಂತಹದೊಂದು ನಿಲುವನ್ನು ತಳೆಯಲಿದೆ.

ನೂತನ ಎಂಜಿನ್ ಈಗಿರುವ 2.2 ಲೀಟರ್‌ ಎಂಜಿನ್‌ನ ಸಣ್ಣ ಸ್ವರೂಪವಾಗಿರಲಿದೆ. ಬಲ್ಲ ಮೂಲಗಳ ಪ್ರಕಾರ ಮಹೀಂದ್ರ 1.9 ಲೀಟರ್ ಎಂ ಹಾಕ್ ಡೀಸೆಲ್ ಎಂಜಿನ್ ಶೀಘ್ರದಲ್ಲೇ ಡೀಲರ್ ಶಿಪ್ ಗಳನ್ನು ಬಂದು ತಲುಪಲಿದೆ. ಈ ಸಂಬಂಧ ಭಾರತ ವಾಹನ ಅಧ್ಯಯನ ಸಂಸ್ಥೆಯಿಂದಲೂ ಅನುಮೋದನೆಯನ್ನು ಪಡೆದುಕೊಂಡಿದೆ.

2015 ಡಿಸೆಂಬರ್ ತಿಂಗಳಲ್ಲಿ ಮಹತ್ವದ ತೀರ್ಪು ಹೊರಡಿಸಿದ್ದ ಸುಪ್ರೀಂ ಕೋರ್ಟ್ ದೆಹಲಿಯಲ್ಲಿ ಹೆಚ್ಚುತ್ತಿರುವ ಮಾಲಿನ್ಯವನ್ನು ತಡೆಯುವ ನಿಟ್ಟಿನಲ್ಲಿ 2000 ಸಿಸಿ ಗಿಂತಲೂ ಮೇಲ್ಪಟ್ಟ ಡೀಸೆಲ್ ಎಂಜಿನ್ ಕಾರುಗಳಿಗೆ ನಿಷೇಧ ಹೇರಿತ್ತು.